Stangveiðifélag Siglufjarðar

Frances.is með opið hús í Svörtu Kríunni

gulli — Sat, 12 May 2012 11:39:34 +0000

Við veiðihjónin á www.frances.is, Dr. Jónas og Frú Eiríksína höfum orðið vör við mikla eftirspurn eftir veiðiflugum hjá okkur þegar við höfum verið á ferðinni í Fjallabyggð með fullt af flugum í farteskinu. Því hef ég ákveðið að vera með flugur til sölu á opnu húsi í Svörtu kríunni. Er það ekki síst vegna þess að ég fékk nýlega inngöngu í Stangveiðifélag Siglufjarðar. Vegna mikillar átthagaástar og til þess að sýna þakklæti fyrir það að hafa smogið í gegnum ströng skilyrði inntökunefndar, langar mig að bjóða 20% afslátt af öllum vörum. Bæði félagsmönnum og öðrum mönnum. Eyrargata 2 verður því aftur veiðarfæraverslun þriðjudaginn 21. maí. Húsið opnar klukkan 18:00 og lokað verður um níueytið eða þegar veiðimenn hætta að streyma. Þeir sem ekki komast á þessum tíma geta haft samband við mig í síma 6904583 og fundið tíma.

Besta kveðja,

Eiríksína Kr. Ásgrímsdóttir

Mynd fengin á vef www.frances.is

JOAKIM´S kynning og sala

gulli — Wed, 11 Apr 2012 21:27:31 +0000

Kynning og sala á Siglufirði 15. apríl 2012. JOAKIM´S ehf. verður með kynningu og sölu á fluguveiðivörum á Siglufirði í Bláhúsinu við Rauðkutorg sunnudaginn 15.apríl frá kl. 12 til 16:00.

Mörg góð tilboð í gangi á flugustöngum bæði einhendum og tvíhendum, hjólum, línum, taumaefni, sökkendum, vöðlum, hjólatöskum, háfum, veiðivestum, fluguboxum, krókum, kúlum, keilum og fleiru.

Vonumst til að sjá sem flesta.

JOAKIM´S ehf

Jón V.Óskarsson

Aðalfundur félagsins verður haldinn laugardaginn 31. mars næstkomandi.

gulli — Sun, 11 Mar 2012 16:40:38 +0000

Aðalfundur félagsins verður haldinn laugardaginn 31. mars næstkomandi í

Bláhúsinu við Rauðkutorg kl. 17:00.

Dagskrá aðalfundar.

1. Kosning fundarstjóra og fundarritara.

2. Skýrsla formanns félagsins.

3. Reikningar ársins 2011.

4. Umræður um skýrslu formanns og reikninga félagsins.

5. Bera reikninga undir atkvæði.

6. Kosning stjórnar.

7. Kosning tveggja skoðunarmanna og eins til vara.

8. Kaffi.

9. Veiðileyfi fyrir árið 2012. Stjórnin hefur ákveðið að aðeins verði hægt að taka heilt leyfi í Fljótaá og verða því þeir veiðimenn sem höfðu hug á hálfu leyfi að taka sig saman við aðra sem voru í sömu hugleiðingum. Ekki verður hringt út til félagsmanna með sölu á leyfum, heldur verða menn að skrá sig fyrir leyfi á fundinum enda koma boðum til stjórnarmanna.

10. Önnur mál.

Stjórnin

Veiðileyfi í Flókadalsá

gulli — Mon, 02 Jan 2012 21:20:40 +0000

Félagsmönnum í Stangveiðifélagi Siglfirðinga mun gefast kostur á að skrá sig fyrir veiðileyfum í Flókadalsá en bréf verður sent út fljótlega. Eins og fyrr hefur verið greint frá mun Jón Heimir Sigurbjörnsson hafa yfirumsjón með sölu veiðileyfa og eru aðrir en félagsmenn hvattir til að hafa samband við hann í tölvupóstfang jonjhs@simnet.is

Stjórnin

Samningur undirritaður

gulli — Sun, 11 Dec 2011 12:21:08 +0000

Í gær var undirritaður samningur milli Stangveiðifélag Siglfirðinga og veiðiréttarhafa í Flókadal. Flókadalsá er nú formlega á vegum Stangveiðifélagsins næstu tvö árin. Það verða Jón Heimir Sigurbjörnsson, Þorgeir Bjarnason og Eiður Hafþórsson sem munu sjá um Flókadalsánna fyrir hönd félagsins.

Haustfundur Stangveiðifélags Siglufirðinga 2011

gulli — Tue, 01 Nov 2011 17:41:39 +0000

Kæri félagsmaður

Haustfundur Stangveiðifélags Siglfirðinga verður haldinn í sal Kiwanis laugardaginn 12. nóvember kl. 18:00.
Fundurinn verður á léttu nótunum, þar sem við munum snæða saman og ræða málin. Stjórnin hvetur félagsmenn til að fjölmenna á fundinn.

Vinsamlegast tilkynnið þátttöku til Dodda Bjarna á netfangið dbjarna@simnet.is eða í síma 861-5980 og til Gulla Stebba á netfangið gunnlaugursg@simnet.is eða í síma 868-7291.

Með vinsemd Stjórnin

Stíflur í ám og áhrif þeirra á fiskstofna

gulli — Tue, 01 Nov 2011 17:38:20 +0000

Fyrirlestur um stíflur í ám og tilraunir til að greiða för sjógöngufiska á áhrifasvæðum stíflumannvirkja verður haldinn í Háskólabíói, Sal 2, kl. 11:50 – 13.20, fimmtudaginn 3. nóvember 2011.

Fyrirlesari er dr. Margaret J. Filardo líffræðingur, forstöðumaður Fiskvegamiðstöðvarinnar (Fish Passage Center) í Oregonfylki í Bandaríkjunum.

Miðstöðin er vísindaleg tæknistofnun sem stundar rannsóknir á ferðum gönguseiða og fullorðinna fiska.

Aðrir sem taka til máls:

Óli Grétar Blöndal Sveinsson, framkvæmdastjóri þróunarsviðs Landsvirkjunar.

Áhrif virkjana í neðri hluta Þjórsár á laxfiska.

Magnús Jóhannsson, fiskifræðingur hjá Veiðimálastofnun.

Rannsóknir á fiskstofnun Þjórsár vegna fyrirhugaðra virkjana í neðri

hluta Þjórsár.

Fyrirspurnir og umræður.

Umræðum stjórnar dr. Guðrún Pétursdóttir, framkvæmdastjóri Stofnunar Sæmundar fróða.

Tilefni fyrirlestrarins er að nú stendur yfir opið umsagnarferli um drög að þingsályktun iðnaðarráðherra og umhverfisráðherra um verndun og nýtingu náttúrusvæða með áherslu á vatnsafl og jarðhitasvæði. Umsagnarferlinu lýkur 11. nóvember nk. og fer málið þá í kjölfarið til meðferðar Alþingis. Áherslan í þessu ferli beinist m.a. að villtu laxa- og sjóbirtingsstofnunum í Þjórsá og áhrifum virkjana í neðri hluta árinnar á þá.

Fyrirlesturinn er haldinn á vegum Verkfræði- og náttúruvísindasviðs Háskóla Íslands, Stofnunar Sæmundar fróða og NASF, Verndarsjóðs villtra laxastofna.

Fyrirlesturinn er öllum opinn en hægt er að tilkynna þátttöku til nasf@vortex.is

Barna og unglingadagur 18. júlí

gulli — Thu, 14 Jul 2011 23:56:46 +0000

Félagsmönnum í Stangaveiðifélagi Siglfirðinga gefst tækifæri á mánudaginn 18. júlí að fara með skyldmenni sín 16 ára og yngri til veiða í Héðinsfjarðará. Veiðitíminn er frá kl. 10:00 til kl. 22:00, skráning er hjá Dodda málara í síma 8615980. Leyfilegt er að veiða á flugu,maðk og spún. Héðinsfirðingarnir og feðgarnir Bjarni Þorgeirsson og Þorgeir Bjarnason munu stýra veiðunum og setja veiðimenn niður á svæði. Athugið að það verður hver og einn að koma með sinn veiðibúnað.

Veiði byrjar í Fljótaá

gulli — Sat, 02 Jul 2011 08:58:23 +0000

Félagsmenn í Stangaveiðifélagi Siglfirðinga hefja veiði í Fljótaá í dag en síðastliðinn sunnudag bauð leigutakinn Orri Vigfússon stjórnarmönnum og fyrrverandi formönnum í opnun árinnar. Einn lax og fjöldi allur af bleikju fékkst í opnunni og telja fróðir menn að þetta viti á gott sumar í Fljótaá. Eins og áður er öllum lax sleppt aftur í ánna enda margmiðið að gera ánna algerlega sjálfbæra. Bleikju má hinsvegar hirða í hófi. Unnið var að lagfæringum á hrygningarstöðum laxins í fyrrahaust á svæði 1 en strax í vikunni eftir það mátti sjá laxapör í djörfum leik á þeim stöðum og binda menn miklar vonir við þessa aðferð við að koma hrygningarstöðunum í gott horf.

Kastnámskeið í Íþróttamiðstöðinni í Siglufirði

gulli — Tue, 10 May 2011 17:45:14 +0000

Stangaveiðifélag Siglufirðinga í samvinnu við Vesturröst mun standa fyrir kastnámskeið í fluguveiði sem verður haldið í Íþróttamiðstöðinni í Siglufirði laugardaginn 21. maí kl. 13:30 og aftur á sunnudeginum 22. maí kl. 10:00, tveir tímar í senn. Námskeiðið mun kosta 5.000 kr. fyrir báða dagana, Ingólfur og félagar í Vesturröst verða kennarar á námskeiðinu. Innanhús er kennt á einhendu og ef veður leyfir verður kennt á tvíhendu utanhúss. Skráningin fer þannig fram að þú sendir tölvupóst á gunnlaugursg@simnet.is.

Vesturröst mun verða með vörukynningu í húsakynnum Bláhúsins við hliðina á Hannes Boy Cafe milli kl.16:00- 18:00 á laugardeginum. Farið yfir allt það helsta tengt fluguveiði, línur, tauma og hnúta. Auk þess verður sýnt það nýjasta í stöngum, línum, hjólum, töskum, jökkum, vöðlum, áhöldum, taumum og fl. Að auki mun Vesturröst kynna strandveiði og þann búnað sem til þarf. Fjöldi sýningartilboða verða í boði auk þess sem félagsmenn í Stangaveiðifélagi Siglufjarðar fá 15-20 afslátt af öllum öðrum vörum.

Verið velkomin og kynnið ykkur málið, sjón er sögu ríkari.

Stangveiðifélag Siglfirðinga